२६ खर्ब ६९ अर्ब पुग्यो सार्वजनिक ऋण, एक वर्षमा कति थपियो ?

समाचार

गृहपृष्ठ
समाचार
२६ खर्ब ६९ अर्ब पुग्यो सार्वजनिक ऋण, एक वर्षमा कति थपियो ?

२६ खर्ब ६९ अर्ब पुग्यो सार्वजनिक ऋण, एक वर्षमा कति थपियो ?

बुधबार, साउन १४, २०८२ शब्दचित्र

काठमाडौं । एक वर्षको अवधिमा २ खर्ब ३१ अर्ब ८ करोड रुपैयाँ सार्वजनिक ऋण थपिएको छ । सार्वजनिक ऋण व्यवस्थापन कार्यालयले यस्तो जानकारी दिएको हो ।

कार्यालयले २०८२ असार मसान्तसम्मको सार्वजनिक ऋणको प्रतिवेदन सार्वजनिक गर्दै यस्तो जानकारी दिएको छ । ‘चालु आर्थिक वर्षको सुरुमा कुल सार्वजनिक ऋण रु २४ खर्ब ३८ अर्ब ४८ करोड रहेकोमा असार मसान्तसम्ममा रु २ खर्ब ३१ अर्ब ८ करोड थप वृद्धि भई कुल सार्वजनिक ऋण दायित्व रु २६ खर्ब ६९ अर्ब ५७ करोड पुगेको छ ।‘

कार्यालयले यो कुल गार्हस्थ उत्पादनको ४३.७१ प्रतिशत हुने पनि जनाएको छ । त्यस्तै कुल सार्वजनिक ऋणमा असार मसान्तसम्ममा वैदेशिक ऋणको हिस्सा ५२.४९ प्रतिशत र आन्तरिक ऋणको हिस्सा ४७.५१ प्रतिशत पुगेको छ ।

कार्यालयका अनुसार आर्थिक वर्ष २०८१/८२ को वार्षिक लक्ष्यमध्ये आन्तरिक ऋणतर्फ लक्ष्यको शतप्रतिशत ऋण उठाइएको जनाएको छ । आन्तरिक तर्फ सरकारले ३ खर्ब ३० अर्ब ऋण उठाउनले लक्ष्य लिएको थियो ।

त्यस्तै बाह्य ऋणतर्फ भने सरकारले लक्ष्यको ५७.७९ प्रतिशत मात्र ऋण उठाउन सकेको छ । सरकारले आर्थिक वर्ष २०८१/८२ मा २ खर्ब १७ अर्ब बाह्य ऋण लिने लक्ष्य लिएको थियो ।

सरकारले आर्थिक वर्ष २०८१/८१ मा ऋण सेवा खर्चमा ४ खर्ब २ अर्ब ८५ करोड बजेट छुट्याएको थियो । त्यसमध्ये असार मसान्तसम्म ३ खर्ब ६२ अर्ब ५९ करोड भुक्तानी भएको कार्यालयले जानकारी दिएको छ ।

प्रकाशित मिति: बुधबार, साउन १४, २०८२ १५:२७